Wednesday, September 22, 2010

Ran Banda Senevirathne - 01 | රණ්බණ්ඩා සෙනවිරත්න - 01

සිංහල ගීත කලාවේ ශබ්ද රසය හා අර්ථ රසය යන දෙකම කැටි වුණ ගීත බොහොමයක් තිබෙන බව අවිවාදාත්මකයි. ගීතයක ශබ්ද රසය ඔප්නැංවෙන්නේ සංගීතවේදියාගේ ප්‍රතිභාවේ මහිමයෙන්. එලෙසම අර්ථ රසය මතුවෙන්නේ පදරචකයාගේ බස හැසිරවීමේ හැකියාවෙන් හා ගීතයට පදනම් වූ නිමිත්තෙන්. අධිනීතීඥ රණ්බන්ඩා සෙනවිරත්න මහතා නූතනයේ බිහිවූ පදරචකයන් අතර ප්‍රමුඛ පෙලේ වැජඹෙන්නක්. ඔහුගේ සුභාවිත පන්හි‍ඳෙන් බිහිවුණ පදවැල් මගින් බොහෝ දෙනෙක් ඔහු හඳුනනවාට සැක නැහැ. රණ්බණ්ඩා සෙනවිරත්නයන් යනු “බොහෝ ගීත” ලියූ පදරචකයන් ගණයට නොවැටෙන්නෙක්. නමුත් ඔහු අතින් ලියැවුණ ස්වල්පප්‍රමාණිත ගී හා කාව්‍ය සංග්‍රහයන් ජන සම්මානයට මෙන්ම විචාරක සම්මානයටද පාත්‍ර වූ බව නොකිව මනායි. එතුමා ගේ බොහෝ  නිර්මාණ සිංහල සංගීතයේ අදත් ඉහලින්ම වැජඹෙන බව නොරහසක්.

රණ්බන්ඩා සෙනවිරත්නයන් ජන්ම ලාභය ලැබුවේ පොළොවෙ පය ගසාගෙන සිටින බොහෝ කලාකරුවන් ජන්ම ලාභය ලද රජරටින්. අනුරාධපුර දිස්ත්‍රික්කයේ මිහින්තලයට නුදුරු මරදන්කල්ල ගමේ. රණ්බන්ඩා මහත්තයගෙ වචනෙන්ම කියනවනම් "ගමේ බයියෙක්".  රණ්බන්ඩා මහත්තයගෙ පවුලෙ සහෝදර සහෝදරියො 14ක්, රණ්බණ්ඩා මහත්තයත් ඇතුලුව. ගමේ ගතකල ක‍ටුක ජීවන රටාව ඔහුගේ ගීත වලින් මනාව ඔප්නැංවී තිබෙන බව පැහැදිලි සත්‍යයක්. බොහෝ ගී ලියැවුණේ ඔහුගේ සත්‍ය ජීවන අත්දැකීම් ඇසුරෙන් වග වරක් එතුමා පුවත්පත් සාකච්ඡාවකට කියා තිබුණා.

මේ එයට දිය හැකි හොඳ උදාහරණයක්..

පබළු නගා හෙවත් සුමනා රණ්බණ්ඩාගේ ඇවැස්ස නෑනා වූ තැනැත්තියයි. රණ්බණ්ඩා පේරාදෙනිය විශ්වවිද්‍යාලයේ  ගතකරන සමයේ සුමනා මැලේරියාව හෝ කහ උණ (නිවැරදිව මතක නැත) සෑදී මියැදිණි. මෙපුවත නිවසේ කිසිවෙකු රණ්බණ්ඩාට සැල නොකළේ ඔහු ඒ වනවිට විභාග කටයුතු වල නියැලී සිටි නිසාවෙනි. විභාගය අවසන් කොට සුමනාට තෑගිත් සමග ගමට පැමිණි රණ්බණ්ඩා ගෙදරට ගොඩවැදී එසැණින්ම සුමනා සොයා යන්නේ ඇයට ගෙනා තෑගි බෝගත් සමගයි. මග සලකුණු අනුව යම් කිසි නරක දෙයක් සිදුවී ඇති බව ඔහුට වැටහෙන්නට ඇත. මේ අත්දැකීම රණ්බණ්ඩා අතින් කවියට නැගී, පසුව ගුණදාස කපුගේ මහතාගේ සංගීතයෙන් හා ගායනයෙන් ලාංකිකයින් සියලු දෙනාට මෙපරිද්දෙන් දැන ගැනීමට ලැබිණි...

 

පබලු නගේ නාමල් තිලකේ ..  
පුංචි ඔසරි මැණිකේ... GunadasaKapuge06a
සුමනෝ....
උඹ ඇයි නැත්තේ...

වැවේ දියේ ඇති නිකින් නිණිල්ලේ..
අඩහඳ යායට කෙකෙටිය පිපිලා..
වැව් කන්දේ බෝගස් හෙවනේ...
මම අද තනියම ඔළිඳ ගනිනවා
වෙනදා වාගෙම තල මල පිපිලා
තිබුණට ඇල ළඟ වත්තේ
සුමනෝ..
උඹ ඇයි නැත්තේ...

මළ හිරු එළියෙන් කොක්කු ගියාදෝ..
මිහින්තලා ගල පැත්තේ …..
පිරුවට ඇඳ පෙට්ටියක තියාලා..
පහන් දෙකක එලි මැද්දේ …..
මදටිය වැටෙද්දි  හඳ කැලතෙන ඇල
ඒදන්ඩේ ඉස්මත්තේ …
සුමනෝ.....
උඹ ඇයි නැත්තේ...
සුමනෝ.....
උඹ ඇයි නැත්තේ...

තනු හා හඬ- ගුණදාස කපුගේ (කපුගේ මහතා මේ ගීයට පාදක රිද්මය (base rhythm) ලෙස යොදාගෙන ඇත්තේ මළබෙර වාදනයක තනුවකි)

වැවේ දියේ ඇති නිකින් නිණිල්ලේ..
අඩහඳ යායට කෙකෙටිය පිපිලා..
වැව් කන්දේ බෝගස් හෙවනේ...
මම අද තනියම ඔළිඳ ගනිනවා …

රණ්බන්ඩා ගේ හා සුමනාගේ සමීපත්වය පරිසරයේ සුන්දරත්වය හා මුසුකොට ඇති සැටි ප්‍රසංශනීයයි..

වෙනදා වාගෙම තල මල පිපිලා
තිබුණට ඇල ළඟ වත්තේ
සුමනෝ..
උඹ ඇයි නැත්තේ...

තලමලක් පීදීම සමහරු දුර්භාග්‍යයක් සේ සලකති, එහෙත් වෙනදා තල මල පීදුන විට මෙවන් වියෝගයක් සිදුවුනේ නැත. එහෙත් අද.. සුමනා නැත..

අවසන් පද කිහිපයෙන් ඉතා හැඟීම්බර ප්‍රකාශනයක් ඉස්මතුකොට තිබෙන සැටි බලන්න..

මළ හිරු එළියෙන් කොක්කු ගියාදෝ..
මිහින්තලා ගල පැත්තේ …..
පිරුවට ඇඳ පෙට්ටියක තියාලා..
පහන් දෙකක එලි මැද්දේ …..
මදටිය වැටෙද්දි  හඳ කැලතෙන ඇල
ඒදන්ඩේ ඉස්මත්තේ …

රණ්බන්ඩා මහත්මයාගෙ තනු බොහෝ විට ගැලැපුනේ ලාලිත්‍යවත් හඬ වලට නොවේ. එයට හේතුව එතුමාගේ පද බොහෝ විට ක‍ටුක අත්දැකීම් හා මුහුන් වී තිබීම යැයි මට සිතේ. ගුණදාස කපුගේ මහතා මේ අතර පෙරමුණේ ම සිටින වග අවිවාදාත්මකයි. එහෙත්  කපුගේ රණ්බන්ඩා සුසංයෝගයේ විශිෂ්ඨතම නිපැයුම මේ නොවේ.

දවසක් පැල නැති හේනේ... 0
අකාල මහ වැහි වැස්සා...
තුරුලේ හංගාගෙන මා ඔබ තෙමුනා අම්මේ....

නුවර වීදි යටකරගෙන නින්දා වැහි වැගිරුන දා
බිරිදකගේ සෙනෙහෙ ගියා යෝධ ඇලේ නැම්මේ......
නුඹෙ සෙනෙහස සුවඳ දිදී දැනුනා මට අම්මේ...

කොළඹ අහස කළුකරගෙන මූහුදු හුලග අඩලන කො‍ට
ඔටුන්න බිම දා දුවගෙන එන්නද එක පිම්මේ
මං එන තුරු ඉදි කඩ ලග ඉන්නවාද අම්මේ............

(ගායනය හා තනු - ගුණදාස කපුගේ)

හේනේ වැස්සට අසුව ගහක් යට හිටගෙනේ
මට උඩින් නැමීගෙන මාව නොතෙමෙන මෙනේ
ඔසරියෙන් මා වසා අම්මෙ ඔබ තෙමුණනේ
අම්මෙ ඔබ නැති ලොවක මා කෙලෙස ලොකු වුණේ

(රණ්බන්ඩා සෙනවිරත්න- හිතේ දුකට කියන කවි)

"දවසක් පැල නැති හේනේ.." යන්නෙහි අරුත මීට පෙර බ්ලොග්කරුවෙකු හෝ පුවත්පතක හෝ (දෙකේම හෝ) වැරදියට අරුත්නංවා තිබෙනු දු‍ටුවෙමි. එහි තිබුනේ  "පැල නැති හේන" යන්නෙහි පැල=hut හෙවත් ගසක් උඩ ඇති පැලක් ලෙස වරදවා වටහාගෙනයි. ඔහු පැල නැති හේන යන්න නිර්වචනය කර තිබුනේ පැලක් නොමැති හේනක්, හෙවත් ගෙදර ගෘහ මූලිකයා  හෙවත් පියා නොමැති නිවසක් ආදී වශයෙනුයි. එහෙත් එය එසේ නොවේ.

පැල නැති හේනක් යනු පාළු වී ගිය පුරන් වී ගිය හේනකි. දරිද්‍රතාවයේ පතුලේ සිටි සෙනවිරත්න පවුලේ මව් එකල සිය දූ දරු කුසගිනි නිවීමට පුරන්වී පාලුවී ගිය අත්හැර දැමූ හේන් වල එලවලු ආදිය එකතු කිරීම කළාය. "දවසක් පැල නැති හේනේ..." යනු ඒ අරුත නංවන්නකි.

දිනක් අම්මා මා සමඟ එබඳු අපේ පාළු හේනක එළවළු එකතු කරමින් සිටියා ය. හදිසියේ ම මොර සූරන වැස්සක් කඩා වැටුණි. අම්මා මා ගහක් යටට ගෙන ගියා ය. වැස්සෙන් බේරීමට ගහේ හෙවන මදි විය. එවිට අම්මා කළේ ඇය ගේ ඔසරි පොට නවා මගේ හිසට දමා මා තුරුළු කොටගෙන මට උඩින් නැමී ගෙන මා වැස්සෙන් ආරක්ෂා කිරීම ය. වැසි වතුර අම්මාගේ ඇඟින් පිරී බේරි වැක්කෙරෙනවා මට මතක ය. එසේ එම වැස්ස තුරල් වනතුරු ම ඇය නොසෙල් වී සිටියා ය **

 

නුවර වීදි යටකරගෙන නින්දා වැහි වැගිරුන දා
බිරිදකගේ සෙනෙහෙ ගියා යෝධ ඇලේ නැම්මේ
නුඹෙ සෙනෙහස සුවඳ දිදී දැනුනා මට අම්මේ

තමාට එල්ලවන නින්දා ගැ‍රැහුම් මධ්‍යයේ වුවද හිමගිර මෙන් නොසෙල්වෙන්නේ මව් සෙනෙහස පමණයි…..

ඔ‍ටුන්න බිම දා දුවගෙන එන්නද එක පිම්මේ

ඔ‍ටුන්න යනු නීතිය පසිඳලන සංකේතයක්, මෙයින් රණ්බණ්ඩාගේ වෘත්තිය ගැන ඉඟියක් ලැබෙනවා.

දොරට ගහන්නේ මම අම්මේ
ඉස්සර දවසක පුතා ඔබේ
මට මග තොට වැරදුනා ඉබේ
දොර අනින්න අපෙ අම්මේ

අලුත් යාලුවෝ කහවනු සොයලා
ඒ මේ අත දිව යනු දැකලා
මමත් ගියා ඔබ අත හැරලා
කහවනු ලෝකෙට රහ වැටිලා

නපුරු කලට කාටත් වරදිනවා
හෙනහුරු අපලෙට බටකොල කනවා
දවසක කාටත් ඇහැ පෑදෙනවා
දොර අරින්න අපෙ අම්මේ

(රණ්බන්ඩා සෙනවිරත්න- හිතේ දුකට කියන කවි)

සේපාල ඒකනායක වෙනුවෙන් අළුත්කඩේ උසාවියේ පෙනීසිටියේත් රණ්බණ්ඩා සෙනවිරත්න මහතායි. දැන් මගෙන් අහන්නෙපා කවුද මේ සේපාල කියල..

රණ්බණ්ඩා මහතාගේ කාව්‍ය කිහිපයකින් හා තවත් ගී කිහිපයකින් නුදුරේදී හමුවෙමු. දීර්ඝ ලිපි බොහෝ පාඨකයන් අතරෙන් ගිලිහෙන නිසාවෙනුත් මගේ කාල වේලාව ප්‍රස්නයක් ඇති නිසාවෙනුත් අදට නවතිමු.

අදාළ ලිපි..

http://blogvampa.blogspot.com/search/label/Gunadasa%20Kapuge

රණ්බන්ඩා මහතා මලියදේව විදුහලේ පැවැත්වූ කථාව

http://tikakhinawenna.blogspot.com/2010/09/blog-post_16.html

http://tikakhinawenna.blogspot.com/2010/09/02.html

 

Disclaimer

අධික වැඩ කටයුතු මධ්‍යයේ වුවත් මේ දිගු ලිපි මාලාව ලියැවෙන්නේ ටිකක් හිනාවෙන්න බ්ලොගය ලියන සහෘද අභීත එදිරිසිංහ මහතාගේ යෝජනාවක් හා අදහසක් මතයි. මෙයට ලැබෙන තුති වලින් කොටසක් ඔහුට නිසැකයෙන්ම හිමි විය යුතුයි. සියලු චෝදනා වල වගකීම් මා විසින් දරනු ලැබේ. වාක්‍ය නොගැලපීම් හා අක්ෂර වින්‍යාස ගැන නොසැලකුවෙමි, දෙවනි වර නොකියැවූයෙමි.

සෙනවිරත්න මහත්තය ගැන මගේ දැනීම එතරම් හොඳ නැති වුවත් ඇසූ දු‍ටු හා සොයාගත් දේවල් මගින් මේ ලිපිය ගොනු කළෙමි. හෙළයාගේ සටහන් ලියූ  සහෘද හෙළයාට විශේෂ ස්තුතියක් පිරිනමමි. වැරදි ඇත්නම් නිවැරදි විය යුතු අයුර කොමෙන්‍ටුවක් ලෙස දමා යන්නේ නම් හෝ blogvampaඇට්gmailඩොට්com ලිපිනයට දන්නවන ලෙස ඉල්ලාසිටිමි. සියලුම වගකීම් ලිපිය නිවැරදි කිරීමෙන් හෝ ඉවත් කිරීමෙන් ඇවිරේ. ලිපියේ ඇති අදහස් මාගේ මතයට අනුව බැව් සැලකුව මනාය.

 

(** රණ්බන්ඩා සෙනවිරත්න ඉරිදා ලක්බිමට ලියූ ලිපියක කොටසක්, උපුටා ගැනීම සිලුමිණ පුවත්පත)

38 comments:

  1. නියම ලිපියක්. පබලු නගේ ගීතය මම ඉතා ප්‍රිය කරන ගීයක්. පසුබිම ඉගෙන ගත්තෙ අදය්.

    ReplyDelete
  2. සුපිරි මචන්... ඇත්තටම මාරම ස්තූතියි........ මට කියන්න වචන නෑ මචන්...... මම මෙච්චර දෙයක් බලාපොරොත්තු උනේ නෑ... ඒත් රන්බණ්ඩා සෙනෙවිරත්න ගැන නොදන්න අයට දැනගන්න සාර්ථක ලිපියක්.... එතුමාගෙ කතාවෙ මට මතක තියෙන අනිත් ටික දාන්න මම තීරනය කලා මචන් මේක කියවලා..... නැවතත් ස්තූතියි මචන්........

    ReplyDelete
  3. සින්දුව ඩවුන්ලෝඩ් කර ගන්න පුඵවන් විදියට දාන්නකො.. ‍ලෝබ නැතිව..

    ReplyDelete
  4. නොදන්න දේවල් ගැන පැහැදිලිව කියලා දෙනවාට බොහොම ස්තුතියි

    ReplyDelete
  5. හරිම අපූරුයි,..අපි නිතර රස විදින සින්දු ගැන කතා..ස්තූතියි...

    ReplyDelete
  6. මචං, සුමනෝ කියන්නේ මගේ ප්‍රියතම ගීතයක්.ඒ වගේමයි දවසක් පැල නැති හේනත්.මේ ලිපිය ලිව්වට ගොඩක් ස්තුතියි.කොච්චර වැඩ තිබුනත් මේකට කොමෙන්ට් නොකර කොහොමැයි? එලමකිරි

    ReplyDelete
  7. රණ්බංඩා මහත්තයා කපුගේට ලියපු මම කැමතිම සින්දුව තමයි උලලේනෝ.ඒක ගැනත් ඉස්ස‍රහට ලියමුද සහෝ..

    ReplyDelete
  8. නියමයි බං... මචං එතුමගේ දින පොතක තොරතුරු පුවත් පතක පළවී තිබුනා මතකයි. ඒකේ විස්තරේ හැටියට අර පැළ නැති හේනේ ගීතය ලියවිලා තියෙන්නේ එතුමගේ බිරිඳ එතුමාව හැර ගියාට පස්සේ. බිරිඳකගේ සෙනෙහෙ ගියා යෝධ ඇලේ නැම්මේ කියල තියෙන්නේ එතුමගෙ බිරිඳගේ සෙනෙහස යෝධ ඇලේ වතුර ගලනවා වගේ (නැම්ම කියල තියෙන්නේ ආනතියටලු) සෙමෙන් සෙමෙන් එතුමගෙන් ඈත් වුන එක. ඒකට හේතුව(නුවර වීදි යටකරගෙන නින්දා වැහි වැගිරුන දා) මට මතක නෑ දැන් මොකක් හරි කට කතාවක් වගේ තමයි මතක. නිවැරදි සිද්ධිය ලිපියේ නම් තිබුනා. කොළඹ අහස කළුකරගෙන මූහුදු හුලග අඩලන කො‍ට කියල තියෙන්නේ තමන්ගේ හිතේ තියන වේදනාව තමයි මට මතක හැටියට. හැමදේම අවසානයේ තමනට හිමිවෙන්නේ අම්මාගේ සෙනෙහස පමණයි.. මේකෙ දොස් තියනවනම් බුදු අම්මෝ නිවැරදි කරන්න.

    ReplyDelete
  9. මට හිතෙන විදියට රන්බණ්ඩා මහත්මයාගේ හොඳම ගීත රචනාව තමයි ' උල ලේනෝ ' ගීතය... ඒකේ පද වැලේ ඉතාම වටිනා අරුතක් තියෙනවා...


    පාලුව දෙවනත් කරලා නාඩන් උලලේනෝ - කාටත් නපුරු දා තනිකම ඇතිවෙනවා..

    හීත හුලං හිරිකඩයි කැලේ අපට උරුමේ.. උඹට පිහාටුයි මට පැල්පතයි තියෙන්නේ..

    ඉහිරුන කිරි කොතලේට ඉකි බිඳලා පලනෑ.. නුඹටත් එක්කයි මේ පැල් කවිය කියන්නේ...

    ReplyDelete
  10. කාන්චන දිනුක හරි.. බිරිඳ එතුමාව හැර ගියාට පස්සේ. බිරිඳකගේ සෙනෙහෙ ගියා යෝධ ඇලේ නැම්මේ කියල තියෙන්නේ එතුමගෙ බිරිඳගේ සෙනෙහස යෝධ ඇලේ වතුර ගලනවා වගේ
    ටිකෙන් ටික දුරස් වුනා කියලා තමයි ගිතයේ තියෙන්නේ. යෝධ ඇල කියන්නේ කලාවැවේ ඉදලා අනුරාධපුර තිසාවැවට වතුර අරන් යන වැවයි. හැතැම්මයකට අගල ගානේ තමයි වතුර බැස්ම තියෙන්නේ..
    ඒක හරි අපුරු සංවෙදී දුර්ලභ ගනයේ උපමාවක් බිදෙන් බිද සෙනෙහස අඩුවුනා කියන්න යොදාගත්ත.. ඒක විතරක් නෙවි ‍මේ ගීතයෙ එන හැම වචනයකටම කම්පිත අර්ථාන්විත බවත් නිරායාසයෙන්ම ගැබ්වෙලා තියෙනවා.

    කොළඹ අහස කළුකරගෙන මූහුදු හුලග අඩලන කො‍ට ඔටුන්න බිම දා දුවගෙන එන්නද එක පිම්මේ.. කියල තියෙන්නේ.. හවස් වෙනකොට හතර වටින් කලුවර වෙන වෙලාවෙ තමයි මිනිහෙකුට පාලුව තනිකම දැනෙන්න පටන් ගන්නේ.
    බිරිදත් අහිමි උන රචකයාට කවියන් අගයන සිහිලැල් මුහුදු සුලග දැනෙන්නේ තවත් අසරණ හැඩලිමක් විදියට විතරයි. මරදන්කල්ල ගමේ ඉපදිලා අනේක විද අතුරු ගැහැට මැද හැමදාම උදේ ගොම රිටි පාගමින් නිරුවත් දෙපයින් හැතැම්ම 8ක් පයින් ඇවිත් අනුරාදපුර මධ්‍යමහා විද්‍යලයෙන් මුල් අකුරු කරපු රණ්බණ්ඩා සෙනවිරත්නයන්ට නිතිඥ වෘත්තිය
    රජකමකටත් එහා. ආදරය- සෙනෙහස අහිමි වු හිතකට ඒ ඔටුන්නේ පලක් නෑ..ඒකයි ඔටුන්න අතහැර කවදාවත් අහිමි නොවන සෙනෙහස සොයාගෙන එන්න අම්මාගෙන් අවසර ඉල්ලන්නේ (එන්නද ? එක පිම්මේ )..
    එත් ඒ සියල්ල අතහැර දාල එනකොටත් අර ඉස්සර ඉස්කොලෙ අරිලා ගෙදර එනකල් කඩුල්ල ලග අවුකාශටකේ මග බලාගෙන හිටපු විදියටම ඉන්නවාද අම්මේ කියලා අහනවා..
    මේ ගිතය රචකයාගෙ පුද්ගලික අත්දැකීමක්බව ඇත්ත. එත් හැම මව් කෙනෙකුටම පොදු නින්දා අපහාස ගැරහුම් සැප දුක හමුවෙ
    හීන නොවන මව්ගෙ සෙනෙහස අපිට තම අත්දැකීම තුලින් සමීප කරනවා. ඒක නිසයි මේ ගිතය ඇහෙන හැම වාරයකම තමන්ගේ ලමාකාලයෙ මව හා සම්බන්ද අත්දැකීමක් එක්ක ගිතය අපිට සමිප වෙන්නේ..
    මේ ගීතය අපිට මවගුණ ගීයක්.. ඒත් රංබණ්ඩා සෙනවිරත්නයන්ට මෙ ගිතය සිය ආත්ම ප්‍රකාශනය වුනා. ඒක හින්දයි අඹ යාළුවාව උසාවියෙ වග උත්තර කරු කලේ ගිතයේ සංගිතය වෙනස් කලාට. නැතුව ගුණදාස කපුගෙ එක්ක
    බද්ධ වෛරයක් නිසා නෙවෙයි.. (ස්වර රචනය හා ගායනය තමන් කපුගේ සතුවු නිසා අදාල නඩුව පරාද වෙන බව දැන දැනත් උසාවිය ඉදිරියට ගෙනාවෙ තමන්ගේ හෘද සාක්ෂියටත් ආත්ම ප්‍රකාශනයටත් කපුගේටත් වඩා සන්ෆලවර් සංගිතයෙන්
    උන අවනඩුව සහෘද හිත නම් වන උසාවියේ ලේඛන ගත කරන්නයි.)

    වර්තමානයේ සමහර ගි රචක මුදලාලිලාට වගේ රංබණ්ඩා සෙනවිරත්නයන් අම්මා මග හැරුනා කියලා හිත සෝදාගත්තේ නෑ.. රූපවාහිණි සංවාද වලට ඇවිත් අම්මා මග හැරුනු බව කියලා පව් හොදාගෙන තමන්ගෙ ටියුෂන් කඩෙට ගරිල්ලා මකටින් කර ගත්තෙත් නෑ කවමදාකවත්.
    මොකද මුදලට පෙම් නොබැන්ද සැබෑ මනුස්සකම අව්‍යජ ගැමි කමත් වියැලුනු රජරට ගහකොලත් සතා සීපාවත් ඔහුට උගන්නලා තිබුන නිසා.

    ගීයක අරුත සෙවිම සංවෙදනා ගවේශනයකි. වෑයමට තුති. මෙය නොනවතින වෑයමක් වේනම් සදා තුති.

    -ප්‍රභා/

    ReplyDelete
    Replies
    1. හිතට දැනෙන විදිහට කියල තියෙනවා.. මේ ගීත තුල මොනතරම් දේවල් ගැබ්වෙලා තියෙනවද කියල හිතෙනවා..
      අම්මගේ ආදරය ගැන කියවෙන මේ ගීතයට ඉතා හොඳ විග්‍රහයක් "රත්න ශ්‍රී විජේසිංහ" කවියා විසිනුත් ලබාදී තිබෙනවා..
      මෙතනින් බලන්න

      Delete
  11. අපූරුම අපූරු ලිපියක් වැම්පො...
    මට කියන්ඩ වචන නෑ...

    අභීත අයියාත් උඹත් ලියන මේ අපුරු ලිපි පෙළ ඇත්තටම අපූරුයි....

    ReplyDelete
  12. නියම ලිපිය. සුමනෝ ගීතය ගැන මම මගේ රෑමා (Dr. ධර්ශන) එක්ක කථා උනා. සිංදුවේ පසුබිම දැනගත්තම සිංදුවේ අගය වැඩි වුණා.

    ලංකාවේ ගීත කලාව අභාවයට යන මේ වගේ කාලයක මේ වගේ ලිපි ලියන, මේ මනුෂ්‍යත්වය සොයා යන කොල්ලො ලංකා මාතාවට අභිමානයක්. උඹට තව තවත් ශක්තිය ධෛර්යය ලැබේවා....!

    ReplyDelete
  13. samawenna mata sinhala akuru neha..godak welawata awilla kiyewwata kawadawath comments daala neha..eth mekata noda beha..e tharam athi wishishtai..Es dekata kandulu enawa hemadaam e sindu ahankota..Praba ge comment ekath godak wedagath saha me wage sanwedi aya inna eka gena loku sathutak..

    ReplyDelete
  14. එල එල පට්ට ලිපිය

    ReplyDelete
  15. හොඳ ලිපියක්. ගීත ඇහුවට නොදැන හිටපු ගොඩක් දේවල් මේකෙන් දැන ගත්තා. බොහොම ස්තූතියි සහෝ මේ වගේ දෙවල් පල කරනවට...

    ReplyDelete
  16. නියමයි. හැමෝගෙම කමෙන්ට්ස් වටිනවා. දිගටම ලියන්න

    ReplyDelete
  17. මචන්ලා "දවසක් පැල නැති හේනේ.." සින්දුවට අශෝක හදගම කියාගන්නා කලාකාරය මාර නිර්වචනයක් දිල තියෙනවා.ඒක හදපු "අක්ශරය" කියන මල ජරාවේ කෑත වහ ගන්න කියපු කතාවක්.ඌ මේ පදයට "මං එන තුරු ඉදි කඩ ලග ඉන්නවාද අම්මේ............" වෙනම අරුතක් දෙන්න හදන්නේ.

    මේක පත්තරයක ගිය විස්තරයක් .පත්තරෙනම් හොය ගන්න බෑරි උනා.

    අපිට මෙක කියපු නලින් ද සිල්වා ගුරු පියා කීවේ "ගීතයේ සෑබෑ අයිතිකරයෝ හිටියා නම් හදගම කෙනෙක් නෑහෑ කියලයි".හදගමයා මේ සින්දුව විනාස කරන්න හඩපු වෙලාවේ ගුණදාස කපුගේ මහතා සහ රණ්බණ්ඩා සෙනවිරත්න මහතා දෙදෙනාම මෙලොව හර ගොසින්.

    ප්‍රභා ගුණ දොසනම් මරු..
    වැම්පයර්ටත් ජය ශ්‍රී තව වෑඩියෙන් ලේ බොන්න ලෑබේවා...

    ReplyDelete
  18. @tharu22@Anonymous@පැන්da@පුබුදුවා

    ප්‍රතිචාරයට ස්තුතියි. රයිට් ක්ලික් කිරීමෙන් සින්දුව බාගත හැකියි.

    ReplyDelete
  19. @අභීත
    උඹට ගොඩක් ස්තුතියි. තව මග එන්න තියනවා...

    ReplyDelete
  20. @sithuwilimandiyaප්‍රතිචාරයට ස්තුතියි. මග එනවා ඒක..

    ReplyDelete
  21. @blog gadolවැඩ රාජකාරි මැද දුන් ප්‍රතිචාරයට නොවක් තුති..

    ReplyDelete
  22. @කාංචන දිනූක@Praba.
    ඔබේ දිගු ප්‍රතිචාර වලට ස්තුතිය පුදකරමි, මාගේ මේ ලිපිය එයින් පරිපූර්ණ වූවා සේ හැඟේ. කෙසේ වතුදු මා විශේෂයෙන් ප්‍රභා ඉදිරිපත් කළ කරුණු ගැන මේ ලිපියේ සඳහනක් නොකලේ කාරණා කිහිපයක් මුල්කරගෙනයි.

    1. රණ්බණ්ඩා මහතාගේ පවුල් ජීවිතයට අදාළ කාරණා වීම
    2. රණ්බණ්ඩා මහතාගේ බිරිඳ ගේ හැර යාමට අදාළ කාරණා කිහිපයක් මා අසා තිබීම හා දැන සිටීම

    එයින් ප්‍රධානයි.

    ඔබ දෙපළ ට මාගේ ස්තුතිය.

    ජයවේවා...

    ReplyDelete
  23. @Praba.අමතරව.. ඔබ විසින් සඳහන් කරන්නට යෙදුණ අවසාන කරුණු කිහිපයට බොහෝ ස්තුතියි. මගේ වැඩේ සෑහෙන්න ලේසි කළා... :)

    ReplyDelete
  24. @Dam
    මා ඒ ගැන අසා තිබුනේ නෑ. දැනුවත් කිරීමට හා ප්‍රතිචාරයට ස්තුතියි...

    ReplyDelete
  25. වටිනා ලිපියක් වැම්පො... උබයි අභීතයි ලියපු ලිපි ටිකින් හුඟක් දේවල් දැනගත්තා... ඇත්තටම අපි දන්නෙ මොනවද මේ මිනිස්සු ගැන කියල හිතුනා....

    මචන් වෙලාවක උලලේනො ගැනත් ලියපන්....

    ReplyDelete
  26. වටිනා ලිපියක් වැම්පො... උබයි අභීතයි ලියපු ලිපි ටිකින් හුඟක් දේවල් දැනගත්තා... ඇත්තටම අපි දන්නෙ මොනවද මේ මිනිස්සු ගැන කියල හිතුනා....

    මචන් වෙලාවක උලලේනො ගැනත් ලියපන්....

    ReplyDelete
  27. @sameerausaසමීර අබේසේකර, ඔබතුමා නිවැරදියි, ඉදිරියේදී ඒ පද මාලාව ගැන කතා කරමු...

    ReplyDelete
  28. මිස් වුණ කවුරුහරි ඉන්නවනම් තරහා වෙන්න එපා...

    ReplyDelete
  29. වැම්පයර්ට පින් !

    ReplyDelete
  30. මම අදයි මේ පෑත්තට අවේ.. ඈත්තටම මෙතුමා සින්හල සන්ගීතය වර්නවත් කලා.. මෙතුමගේ නාමය සදා අමරනීයයි............ තාමත් පොලවේ පය ගහලා ජීවත් වෙන කොල්ලෝ සෙට් වුනාම කියන සින්දූ තමයි දවසක් පෑල නෑති හේනෙ, සහ ලදුනේ සින්දූ...

    ReplyDelete
  31. http://thisaraps.blogspot.com/2010/03/blog-post_09.html හා
    http://ndm1989.blogspot.com/2010/05/blog-post_18.html

    මත ගැටුමක් නිසා මෙතනට ඇවිත් විසඳගත්තා ස්තුතියි වැම්පා ...

    ReplyDelete
  32. හරවත් ලිපියක් කියවන්න පුලුවන් වීම සතුටක්!

    ReplyDelete
  33. බොහොම හොඳ, හරවත් ලිපියක්. ගොඩක් ස්තූතියි මිත්‍රයා.

    ReplyDelete
  34. දන්නා කෙනෙක් කියලදෙන්න පුලුවන්ද "නිකින් නිණිල්ලේ" කියන්නේ මොකක්ද කියල (වැවේ දියේ ඇති නිකින් නිණිල්ලේ.. අඩහඳ යායට කෙකෙටිය පිපිලා..)....????

    ReplyDelete

මොනවා හරි කුරුටු ගාමු... comments will be visible after approval ...!

LinkWithin

Related Posts with Thumbnails